O comportamento cidadán segue sendo a pedra de toque coa que tropezan todas as medidas de control despregadas polas administracións. A falta de coidado, as reunións sociais sen precaucións ou o lecer nocturno están na orixe da maioría de contaxios de coronavirus.
O Concello de Pontevedra leva máis de 160 denuncias polo mal uso das máscaras ou por non respectar horarios ou aforamentos en establecementos abertos ao público. O pasado fin de semana, axentes da Policía Local impuxeron seis denuncias por non levar máscaras (133 en total desde o 18 de xullo, cando se decretou a súa obrigatoriedade). Dous delas foron para persoas que circulaban en bicicleta e que non levaban máscara sen estar a facer deporte.
O mesmo fin de semana houbo dúas denuncias a locais que pecharon fóra do seu horario e con clientes dentro (31 multas en total desde o final da desescalada). Un dos locais foi denunciado ás 2.00 da madrugada por ter 15 persoas dentro. A segunda denuncia foi á 1.50 da madrugada por estar, cando menos, 34 persoas nun local, todas elas sen máscara e sen respectar a normativa covid.
O Concello tamén rexistrou catro domicilios dados de alta na recollida de lixo e dous aos que se lles presta auxilio a través de Protección Civil.
POLICÍA AUTONÓMICA. A Policía Autonómica, á súa vez, despregou o fin de semana 30 dispositivos de control no marco do plan de actuacións específicas destinadas á prevención, inspección e control do cumprimento das medidas da covid-19. Realizáronse nove inspeccións en sete municipios, nos que se rexistraron catro identificacións.
Os concellos controlados foron Pontevedra, Vigo, Marín, Moaña, Redondela, Sanxenxo e Poio. En toda Galicia controláronse un total de 23 concellos.
