O Concello reclamará á Garda Civil que controle os excesos de velocidade na Rolda Leste. O concelleiro de Obras e Mobilidade, Demetrio Gómez Junquera, asegurou este venres que os vehículos que circulan pola vía provincial, que se abriu ao tráfico o pasado 10 de outubro, superan o límite de 30 quilómetros por hora.
O edil nacionalista apoia a súa denuncia na campaña de aforamentos levada a cabo o mes pasado pola Deputación. O estudo, realizado entre o 24 e o 31 de outubro, revela que a velocidade media rexistrada nesta estrada sitúase en 60 quilómetros por hora, o dobre do permitido. "Estamos moi preocupados", afirmou Gómez Junquera, que recordou que a velocidade máis alta, de 67 quilómetros por hora, detectouse durante a madrugada.
Na súa comparecencia, o responsable municipal avanzou a posta en marcha dun paquete de obras para mellorar a seguridade viaria na zona, tal e como solicitaban os veciños. A actuación consistiu na instalación dun paso de peóns no entroncamento con Pintor Laxeiro e na ampliación da senda peonil cara a Pedra do Lagarto.
A Deputación instala un paso de peóns no entroncamento con Pintor Laxeiro e amplía a senda peonil cara a Pedra do Lagarto
Os traballos executounos a Deputación Provincial tras unha solicitude do Concello de Pontevedra para corrixir os erros detectados na obra. O requirimento partiu do enxeñeiro municipal o pasado 29 de outubro, 19 días despois de que a Rolda Leste abrise ao tráfico. Nel, o técnico recomendou a colocación de pasos de peóns e o reforzo da sinalización horizontal e vertical nesta vía. Os traballos obrigaron a intervir nun muro da zona.
Gómez Junquera asegurou que todas estas intervencións farán que "a vida dos veciños mellore". A súa execución produciuse logo da protesta que estes realizaron durante a inauguración da estrada, na que cortaron a rotonda de acceso á Rolda Leste á altura de Pintor Laxeiro para reclamar máis seguridade viaria.
300 vehículos durante as horas punta
A Rolda Leste contabiliza uns 300 vehículos nas horas punta do día.
Previsión: 5.550 coches
O cálculo técnico sinala que pola Rolda Leste pasarán unha media de 5.500 vehículos ao día no horizonte de 2027, só mil máis que na actualidade.
CARACTERÍSTICAS. A vía ten unha lonxitude de 970 metros cunha única calzada e dous carrís de circulación (de 3,50 metros cada un), beiravías dun metro e unha berma de 0,75 metros, así como unha senda peonil para ciclistas e peóns de catro metros de longo.
O trazado iníciase na glorieta da estrada do Pino-Bora, a denominada PO-542, e conclúe na terceira rotonda, construída sobre a PO-532, nas inmediacións de Príncipe Felipe e o Hospital Montecelo.
A obra, que executou a empresa Coviastec, custou máis do previsto. O orzamento pasou dos 2,4 a 3,3 millóns de euros pola modificación das deficiencias do proxecto inicial, as expropiacións de terreos e a necesidade de trasladar torres de alta e media tensión que estaban no medio do trazado.
CERO MORTES. Un dos alicerces do modelo urbano de Pontevedra ten que ver coas medidas de calmado de tráfico. O seu obxectivo é reducir os accidentes e, de paso, contribuír ao obxectivo das cero mortes en estradas.Ademais das peonalizacións, que se impulsaron en 1999, o Concello ten en marcha outras políticas de mobilidade. En 2004 instalou os primeiros lombos para reducir a velocidade de circulación dos coches. En 2010 implantou a zona 30 en todas as vías urbanas, unha medida que permitiu rebaixar a sinistralidade. De feito, desde febreiro de 2011 non se rexistran mortos nestas estradas.
