O Concello de Pontevedra iniciou negociacións coa orde das Clarisas coa intención de comprar o convento de Santa Clara. Así o anunciou este xoves o concelleiro de Urbanismo, Xaquín Moreda, quen precisou que é a fundación de carácter eclesiástico Las Edades del Hombre —responsable de xestionar o patrimonio da Igrexa de Castela— a que está a actuar de interlocutora entre a Administración municipal e a orde relixiosa.
"Actualmente somos os únicos que estamos a negociar con elas. Non hai ninguén máis en conversas", afirmou o edil.
A intención do Goberno local pontevedrés é facerse cos 12.925 metros cadrados que suma todo o conxunto de Santa Clara, incluíndo tanto o convento e a igrexa (4.419 metros cadrados edificados) como os 8.506 metros de parcela, a fin
No entanto, de momento é moi pronto para falar de cifras nin de usos. Segundo aclarou Moreda, proximamente técnicos municipais acudirán a visitar as instalacións para facerse unha idea máis clara do seu estado e poder considerar un valor inicial de compra-venda a partir do cal seguir negociando.
"De momento, as monxas ven con moi bos ollos que o convento pase a mans do Concello, que pase a ser para uso do pobo e non de ningún especulador", indicou o concelleiro nacionalista. "Trátase de máis dunha hectárea de terreo en pleno centro da cidade, nunha localización óptima, o que suporía contar cunha zona pública moi importante para os pontevedreses".
Con respecto a posibles usos, o Goberno municipal aínda non os ten claros. "O edificio da igrexa pode ser desacralizado e incluso se poderían trasladar os restos das monxas que están enterradas no recinto", sinalou o edil, que tamén precisou que se trata dun Ben de Interese Cultural (BIC) e está suxeito á protección de Patrimonio.
O convento de Santa Clara pechou no ano 2017, tras a marcha das últimas monxas que quedaban nel. O que levou ao Concello da capital a iniciar agora as negociacións para a súa compra foi comprobar o interese que suscitan estas instalacións entre a cidadanía (as 75 prazas dunhas visitas guiadas organizadas recentemente esgotáronse nun minuto) e, sobre todo, atopar un interlocutor para establecer conversas. "O interlocutor localizámolo precisamente con esas visitas", aclarou Moreda.
