O Concello relanzará as súas obras con outros 14,6 millóns de euros

O Concello dará un importante impulso ás súas obras e proxectos este ano. E farao grazas a unha modificación de crédito que incorporará ao Orzamento de 2021 outros 14.689,440,96 euros. A partida procede dos remanentes que o Goberno central permite utilizar aos concellos tras levantarse o veto imposto polo anterior Executivo, o de Mariano Rajoy. A medida ten como obxectivo favorecer a actividade económica no ámbito local e tratar de conter o impacto da crise xerada pola pandemia do coronavirus.

O diñeiro servirá para financiar 52 actuacións en distintos ámbitos: obra pública, instalacións deportivas, parques, xardíns, subvencións, loita contra a pobreza ou campañas cívicas e de promoción económica. O Goberno local aprobará esta operación no Pleno deste mes.

A iniciativa foi presentada este mércores polo bipartito nunha rolda de prensa conxunta entre o BNG e o PSOE. "Con esta modificación rompemos ou peto para xerar emprego, economía e atender as necesidades sociais urxentes", dixo o alcalde, Miguel Anxo Fernández Lores, que recordou que as contas de Pontevedra sufrirán unha importante inxección. Pasarán de 80,73 a 112 millóns de euros tras as incorporacións de crédito engadidas o pasado mes de marzo.

A partida con maior orzamento é a compra do convento de Santa Clara, que se pagará a través desta modificación de crédito. En total, 3,2 millóns de euros, que é a cantidade apalabrada coa Orde das Clarisas, propietarias do cenobio.

Ao rural consignaranse tres proxectos que superan os tres millóns de euros. Servirán para mellorar a accesibilidade e a seguridade viaria das parroquias e renovar a iluminación públicou en Marcón e Mourente.

Ademais de terminar de pagar a reforma de Loureiro Crespo e O Castañal, que finalizará o próximo mes de xullo, o Concello empregará o novo crédito para iniciar a reforma integral de Barcelos. Para esta intervención resérvanse 1.128.067,97 euros, o que equivale ao 20% dos case 5,8 millóns previstos. O diñeiro utilizarase para a remodelación dos viarios perimetrais da céntrica praza.