O Xulgado de Instrución 1 de Pontevedra condenou a un veciño do barrio da Parda a unha pena dun mes de multa cunha cota de seis euros diarios e ao pago dunha indemnización de 800 euros por un delito de lesións leves tipificado no artigo 147.2 do Código Penal, logo de agredir a unha veciña súa causándolle dúas fracturas, unha nun dedo e outra nunha das súas costelas.
Os feitos, tal e como detalla a maxistrada na sentenza, producíronse sobre as 13.00 horas do 31 de maio de 2019. A xuíza destaca que as relacións entre vítima e condenado non eran boas. De feito, ela "formulou varias denuncias contra el", segundo sinala o ditame.
O citado día, "atopáronse na rúa do seu domicilio cando ambos estaban cos seus respectivos cans". O condenado levaba ao seu solto, mentres que a agredida levábaos atados. "Fose por este motivo ou por calquera outro derivado da mala relación existente, produciuse un incidente entre eles: o acusado quería entrar no inmoble, pero a vítima estaba diante da porta, polo que a empuxou para pasar e logo pechou a porta pillándolle un dedo", certifica a sentenza nos seus feitos probados.
"A consecuencia do empuxón, a muller sufriu fractura extremo distal da undécima costela dereita, e por mor de pillarse o dedo coa porta sufriu fractura terzo distal da falanxe proximal da man dereita", engade a xuíza, que precisa que "precisou tratamento consistente en analgesia, férula de confort e repouso, tardando en cursarse 20 días impeditivos".
Na vista oral, a denunciante e o agora condenado coincidiron ao sinalar a mala relación existente entre ambos, aínda que este último asegurou que "todo é mentira", indicando que non recorda o que ocorreu aquel día, pero destacando que non se produciu discusión algunha.
A xuíza, ante as versións enfrontadas, apoiouse na persistencia na declaración da vítima, na que "non hai fisuras", así como no parte médico de asistencia e no posterior informe de Sanidade, para ditar sentenza condenatoria.
Ademais, e ante a ausencia de recurso por ningunha das partes, o ditame emitido en primeira instancia xa é firme.
