A sección cuarta da Audiencia Provincial de Pontevedra condenou a penas que suman 12 anos e 11 meses de cárcere a un veciño da cidade por maltratar de forma habitual á súa muller, á que agrediu sexualmente e ameazou.
Na sentenza, os maxistrados consideran probado que o acusado, que estivo casado durante 40 anos coa vítima, antes de separarse en 2018, se dirixía á súa parella de forma vexatoria e maltratábaa, especialmente a partir de 2016, cando estivo un tempo sen traballar.
O tribunal provincial sinala que tiña un "comportamento agresivo e controlador", que agredía e ameazaba de forma constante á súa muller, á que dicía que a ía a matar, e insultábaa de forma frecuente. Esta situación xerou na vítima "un sentimento de medo e temor permanente".
A Audiencia tamén considera probado que, polo menos nunha ocasión, o acusado obrigou á muller a manter relacións sexuais, e intentouno noutra, desistindo ante a advertencia da súa esposa de que gritaría e poderían escoitala uns familiares. En todo caso, a sentenza reflexa que os informes periciais evidencian que a muller foi sometida a outros episodios similares.
Ademais, os maxistrados dan credibilidade ao testemuño da vítima (salvo polas contradicións sobre unha das supostas agresións sexuais, que non ven probada) e tamén ao de testemuñas, como unha sobriña e unha filla do matrimonio, que relatou no xuízo que "sempre" tivera medo ao seu pai, e que eran frecuentes as discusións, insultos, berros e ameazas cara á súa nai por parte do acusado.
Por todo iso, o tribunal considera ao acusado autor dun delito de malos tratos habituais en domicilio, un delito de ameazas contra a muller, un delito de lesións, un delito de agresión sexual (co agravante de parentesco e xénero) e outro en grao de tentativa (co agravante de parentesco e xénero, e a atenuante de intoxicación etílica).
Así, condénao a penas que suman 12 anos e 11 meses de cárcere, e impón a prohibición de achegarse á vítima durante máis de 21 anos, a prohibición de ter armas durante 6 anos e medio, e a medida de 9 anos de liberdade vixiada. En canto á responsabilidade civil, establece que deberá indemnizar á súa exmuller en algo máis de 6.000 euros polas lesións e o dano moral.
