O 19 de agosto de 2020, dous empregados de O Buda do Moroso acudiron, no exercicio das súas funcións e a bordo dun coche fúnebre cun cadaleito no seu interior, ás inmediacións do posto de traballo dun individuo que, supostamente, contraera débedas cun dos seus clientes. "Unha vez no lugar, estacionaron o vehículo na porta do establecemento –un coñecido supermercado de Salvaterra do Miño–, á vez que abriron o portón traseiro, deixando á vista parte do cadaleito, dirixíndose ás persoas que entraban en establecemento dicindo que o aludido era un pufero e que pagase a súa débeda, todo iso polo período dunhas dúas horas", detalla a sentenza, que non considera acreditados insultos que refire o denunciante.
Tales feitos, considerados insuficientes para condenar polo xulgado instrutor, son considerados pola Audiencia "unha actuación ilícita, unha coacción dos denunciados que, utilizando a vía de feito e fóra das canles legais, mediante a humillación e o escarnio público, diríxense a clientes diversos chamándolle pufero á vez que mostran papeis nos que se fai mención á débeda".
Por iso, a Audiencia revoga a sentenza absolutoria e condena aos dous empregados da firma de cobradores de morosos a sendas penas dun mes de multa a razón de dez euros diarios por un delito leve de coaccións.
