O xulgado de Menores de Pontevedra acaba de condenar a un menor ao pago de 7.288 euros por queimar diverso mobiliario urbano en Pontevedra. A sentenza, que este luns fixo pública o portavoz municipal, Raimundo González Carballo, aclara que o pago da indemnización ao Concello podería recaer na Xunta, como responsable solidaria. E o motivo é que o mozo está tutelado pola Consellería de Política Social.
O menor recoñeceu en sede xudicial os feitos imputados: provocar incendios en diversos colectores de lixo e papeleiras situadas en Campolongo e As Corvaceiras. Os actos vandálicos producíronse entre o pasado 6 de xaneiro e o 16 de febreiro en cinco puntos da cidade: Monte do Taco, avenida de Xeneral Rubín, Rúa Tablada, Rosalía de Castro e Iglesias Vilarelle.
A sentenza, que condena ao mozo por un delito continuado de danos por incendio, tamén lle impón a prestación de 80 horas en servizo da comunidade.