Condenas de dez anos de cárcere para os xefes do alixo de cocaína do Nergha

A Audiencia Nacional condenou a penas de dez anos de cárcere aos dous responsables do intento de introdución nas Rías Baixas dun alixo de 1.200 quilos de cocaína que foi cargado ante as costas de Surinam e interceptado por autoridades españolas nas inmediacións de Azores, rumbo a Galicia, no mes de xuño de 2020.

A caída da droga incluíu neste caso detencións e rexistros en terra, entre eles as dúas persoas que lideraban o grupo de narcotransporte, fincadas no corazón de O Salnés: Ribadumia e Vilanova de Arousa.

A sentenza, que inclúe penas importantes para outros sete investigados, a maior parte deles orixinarios de distintas localidades da provincia de Pontevedra, procede dunha investigación iniciada en 2019 pola Brigada Central de Estupefacientes e a Unidade Central Operativa, cos seus equipos Greco e Eco desprazados en Galicia, que acabou confluíndo nun operativo conxunto que cristalizou cunha abordaxe en altamar no que tamén participou o Servizo de Vixilancia Aduaneira.

O ditame vén confirmar que os dous principais investigados "puxéronse de acordo para realizar transportes de cocaína en barcos veleiros que sairían dos portos galegos e retornarían coa súa carga ás mesmas costas galegas". Para iso, engade a AN, contactaron con persoas da súa confianza, entre elas algunhas con contactos en Portugal, país que empregarían como lugar de tránsito e abastecemento das embarcacións que pretendidamente partirían e regresarían ás Rías Baixas. No caso concreto, o veleiro investigado, de nome Nergha, chegou a sufrir un accidente nos meses previos ao intento de narcotransporte en momentos nos que xa estaba a ser vixiado.

Na fase de explotación do operativo, que concluíu co apresamento do barco e o seu posterior remolcado ata o porto de As (cunha vea rota e sen motor, dificilmente podería ser conducido a Galicia), tomaron gran relevancia os rexistros nos domicilios dos dous principais investigados, nos que se acharon indicios moi relevantes acerca da súa participación nos feitos que eran obxecto de investigación, especialmente en forma manuscrita, con indicacións acerca dos puntos de recepción da droga, de entregas de diñeiro a distintas persoas relacionadas co negocio clandestino e con puntos concretos para a singradura, todo iso coincidente coas investigacións paralelas efectuadas polos citados grupos especializados da Policía Nacional e a Garda Civil.

Resultaron condenados a penas de nove anos e medio de cárcere todos os tripulantes do Nergha, coñecedores sen ningún xénero de dúbidas, a ollos do tribunal, da actividade ilícita de tráfico de drogas a gran escala que estaban a realizar. Un noveno acusado tivo mellor sorte e recibiu unha condena de cinco anos, mentres que os dous restantes resultaron absoltos por falta de probas concluíntes sobre a súa participación.

O cargamento de cocaína comisado foi o terceiro dunha das maiores ondas que se recordan en dirección a Galicia, seguindo ao das lanchas que recolleron o cargamento do veleiro afundido Benirrás e ao mercante Karar, dous frandes operativos do primeiro semestre de 2020 aínda por xulgar.