A delegada da Xunta en Pontevedra, Luisa Piñeiro, quixo dar a cara ante os medios informativos para ofrecer o seu punto de vista sobre a sentencia que a condena a dous anos de prisión e oito de inhabilitación por prevaricación e fraude. Fíxoo soa, a petición propia, poucas horas logo de transcender a resolución xudicial e as súas primeiras palabras foron para anunciar que renunciaba a todos os cargos públicos que ostenta.
Nun xesto pouco habitual na actual política -onde outros cargos investigados e condenados aferráronse aos seus postos ata que a sentenza foi firme-, Piñeiro preferiu dar un paso ao carón "para non prexudicar á institución que represento, a Xunta de Galicia", aínda que mantivo en todo momento a súa inocencia.
Ademais, a exrexidora de Moraña tamén desvelou a súa inmediata baixa nas filas do Partido Popular, do que era secretaria de organización na provincia de Pontevedra. Todo iso, insistiu, coa única finalidade de non provocar danos colaterais.
Durante a súa comparecencia avanzou, en todo caso, que recorrerá o fallo do Xulgado "para defender a miña honorabilidade", xa que reiterou que "en todo momento" a súa actuación como alcaldesa foi correcta.
"Confío plenamente na miña inocencia. Quero centrarme na defensa da miña actuación ante a xustiza que me parece que é o máis correcto", sinalou.
Tras mostrar a súa "desconformidade" coa sentenza, a ata agora delegada da Xunta en Pontevedra asegurou que chegará "ata onde faga falta" para demostrar a súa inocencia.
"Traballei sempre única e exclusivamente para o benestar e o progreso de Moraña", engadiu Piñeiro, tras recoñecer estar "totalmente sorprendida" con esta sentenza.
Recordou que o proceso de contratación, adxudicación, dirección, control e certificación destas obras "foi doutra institución que non era a que eu estaba a representar", e mantivo que ela, como alcaldesa, "non tiña ningunha responsabilidade".
"Porque pedín unha subvención hoxe estou aquí", lamentou.
Luisa Piñeiro insistiu en que o proceso de concesión desta subvención é o mesmo que os 313 alcaldes galegos "facemos todos os días no noso traballo", e insistiu en que a súa actuación como rexedora de Moraña "sempre estivo axustada a dereito":
O presidente provincial do PP, Alfonso Rueda, expresou publicamente o seu apoio á súa compañeira a través de Twitter, agradecéndolle "todo o seu traballo ao longo da súa vida política e, especialmente, o magnífico desempeño nesta etapa como delegada da Xunta en Pontevedra", cargo ao que accedeu o pasado 18 de setembro.
"Seguro que pelexará por demostrar a súa inocencia e honorabilidade; agardo que o recurso que interpoña lle dea a razón", agrega o responsable do PP na provincia.
