As restricións asociadas á pandemia do coronavirus tamén pasan factura aos furanchos. O sector debátese entre reabrir as súas portas ou manter o ferrollo botado polos límites horarios, que equiparan a súa actividade á da hostalería "Como vou abrir se cando entran os clientes pola porta teño que pechar?", pregúntase José María Cortizo, propietario do loureiro Casa da Luga, situado no lugar de Pintos, na parroquia de Marcón. "Non teño pensado abrir ningún día. Se ás nove da noite teño que ter á xente fóra, a onde vou?", engade.
Cortizo asegura que quedan uns 3.000 litros de viño na adega e espera poder darlles saída entre particulares, amigos ou familiares. "Xa vendín algúns cartóns", sinala.
Segundo os últimos datos facilitados polo Concello antes de Semana Santa, só dous dos 22 furanchos de Pontevedra solicitaran permiso ao servizo de Urbanismo para retomar a súa actividade na primavera. O sector presume que poderían ser máis ao longo dos próximos días, posto que a Federación de Furancheiros, Loureiros e Viticultores de Pontevedra e a Asociación de Viticultores Val do Lérez acaban de rexistrar na Administración local unha solicitude para ampliar a tempada ata o próximo 31 de xullo.
O Concello recibe a solicitude do sector para ampliar a tempada ata o próximo 31 de xullo
Esta prórroga suporá aumentar un mes máis a campaña deste ano. E poderá facerse grazas á recente modificación da ordenanza que regula os furanchos na capital provincial. Sen a reclamación formal dos colectivos que representan ao sector esta moratoria non podería aprobarse a pesar de estar incluída na normativa.
TRES MESES. O regulamento local permite a apertura destes establecementos durante tres meses entre o 1 de xaneiro e o 30 de xuño, aínda que o cambio no texto permite ampliar un mes máis este período a condición de que concorran causas excepcionais.
Ademais, a ordenanza establece un horario limitado para os loureiros. De luns a xoves, os propietarios poderán comercializar o excedente de viño das súas propias colleitas entre as cinco da tarde e medianoite. Os venres e vésperas de festivos, a atención ao público amplíase ata a unha da madrugada. E os sábados poden abrir entre as doce da mañá e a unha da madrugada. O horario de domingos e festivos tamén empeza a media mañá, aínda que o peche adiántase unha hora, ata medianoite.
O toque de queda e as restricións de aforamento polo coronavirus manteñen este calendario no caixón.
En canto á comida, os furanchos de Pontevedra só poden servir táboas de embutidos e queixos, tortilla, pementos de Padrón e outros pratos a elixir entre orella ou chourizo e zorza ou raxo. A parroquia con máis establecementos deste tipo no municipio é Marcón, con oito, seguida de Tomeza e Salcedo, con tres cada un.
