Os envíos a Sogama crecen en Pontevedra. E iso a pesar da posta en marcha do plan de compostaxe, cuxa expansión avanza de forma moi tímida no municipio.
A planta de Cerceda incinerou o ano pasado 29.719,77 toneladas de residuos procedentes da capital, o que supón 91 máis que durante o exercicio anterior e 473 máis que desde o inicio do mandato, en 2015.
Os datos facilitados onte pola empresa pública dependente da Xunta pon de manifesto que Pontevedra xera cada vez máis lixo. E que esta se traslada ao complexo de Sograma para ser queimada, unha práctica que a Unión Europea insta a combater a través doutros métodos de reciclaxe. Un deles é a compostaxe, que o Concello iniciou no verán de 2016 coa instalación dos primeiros composteros comunitarios en Monte Porreiro.
Na actualidade, Pontevedra dispón de 14 complexos deste tipo, onde se tratan os restos de comida. Tres deles están situados no citado barrio, concretamente nas rúas Alemaña e Italia e na Praza de Europa. A eles sumáronse logo outros sete en distintos puntos: en xaneiro de 2017 estreouse o situado á beira da Facultade de Ciencias Sociais e o resto, o de Forestais, os dous primeiros de Eduardo Pondal, o de San Brais (Salcedo), o primeiro de Camiño de Ferro e o de Ponte Boleira, abríronse en 2018.
O mes pasado rematouse a colocación de catro novos módulos comunitarios no centro urbano na Parda, Camiño de Ferro e Ponche Boleira. Estes últimos atenderán a unha poboación de 1.200 persoas, segundo datos do Concello, que asegura que estas instalacións tratarán unha media de 184 toneladas de lixo doméstico ao ano.
En paralelo a este traballo, o Goberno local iniciará este mes a repartición dos composteiros individuais nas casas con horto do municipio, a maior parte delas situadas no rural. As primeiras parroquias que recibirán estas unidades serán Salcedo, Tomeza e Campañó. E a encargada de facer chegar estes recipientes aos veciños será a asociación Fruga, a través dun contrato coa Deputación, que colabora coa distribución dos 8.000 composteros que Pontevedra comprou.
A NIVEL PROVINCIAL. Sogama tamén fixo este venres balance do volume de lixo que lle chega desde distintas partes de Galicia. Tomando como referencia o ano 2015, que é cando se celebraron as últimas eleccións municipais que conformaron os gobernos das catro deputacións da comunidade, a empresa pública asegura nun comunicado de prensa que Pontevedra foi a provincia galega que máis incrementou os envíos á planta de Cerceda. Fíxoo nun 2,92%, fronte ao 2,53% de Lugo, o 1,29% de Ourense e o 0,54% da Coruña. "Se en 2015 a provincia pontevedresa xerou 338.059,26 toneladas de refugallos, en 2018 esta cifra subiu ata as 347.941,25 toneladas", sinalou a sociedade autonómica.
Sogama indicou, por outra banda, que todos os municipios das Rías Baixas están adscritos ao seu modelo de incineración. O único que se escapa a este método é Pontecesures, que utiliza os servizos da planta da Barbanza.
No comunicado, a empresa pública pon como exemplo a Marín e Vilanova como localidades que máis reduciron a produción de lixo durante 2018.