A axenda festiva de Pontevedra continúa contando cunha boa acollida do público. A pesar de ser luns, foron moitos os que se animaron a asistir ás actividades e propostas das festas da Peregrina máis atípicas da historia.
Como en días anteriores, a xornada comezou pola mañá co programa Ruando, co que os viandantes puideron gozar da actuación de Os Alegres no barrio da Parda e de Gaiteiros das Rías Baixas no centro histórico, e pola tarde do espectáculo, tamén musical, da asociación Duos Pontes no barrio do Burgo e de Os Alegres no centro histórico.
[Eladio y los Seres Queridos. RAFA FARIÑA]
A proposta cultural non se esquece dos máis pequenos, que se divertiron coas criaturas que conforman os pasacalles. Este luns foi a quenda de O estraño caso do dentista da rúa Brasov que actuou no centro histórico da cidade, ademais doutros que o fixeron pola mañá no barrio de San Roque e pola tarde na Avenida de Vigo.
Os nenos tamén puideron gozar da programación de Ven Trebellar nas Peregrinas, que continuou con bailes, xogos e coa actuación de Bambolina, un espectáculo interactivo no que dous pallasos viviron aventuras entre chistes e a participación do público.
Os amantes da cultura urbana puideron atopar igualmente o seu espazo nas festas, deleitáronse coa música de Monoulious Dop acompañada dunha ilustración cortesía de Mente de amuleto, e máis tarde puideron escoitar unha narración da actriz Isa Risco en sintonía cos grafitis de O'Ras.
[A banda Laroa. RAFA FARIÑA]
Para toda a familia, a maxia converteuse nunha das mellores opcións baixo o programa Pontevedra Máxica, cos trucos de Óscar Fernández e Xulio Merino que fixeron aparecer a ilusión e sorpresa dos seus espectadores. Para rematar, xa de noite, foi a quenda dos concertos.
Actuou Laroá, unha banda de World Music que combina sons mediterráneos, latinos e de jazz, sempre sen esquecer a tradición, pero atopando a súa linguaxe propia. A continuación foi a quenda do gaiteiro de Poio e a súa banda Óscar Ibáñez & Tribo. Finalmente Eladio e os Seres Queridos foron os encargados de pechar a xornada cultural.
A banda indie, que leva activa desde 2005, presentou este ano o seu último disco Academia, para o que recorreron á autoproducción, podendo así levar os seus propios tempos de composición, produción e gravación, e colaborar con diferentes artistas.
