A Policía Nacional chegou ata os supostos responsables da maior plantación de marihuana xamais vista na cidade de Pontevedra, destruída hai agora tres semanas por efectivos do Grupo II da Udyco da Comisaría Provincial. A operación, que segue en marcha, serviu para desmantelar a gran horta galega da marihuana, coa incautación dunhas 8.000 plantas e o arresto dos xefes, entre eles o cidadán albanés M.A., alias Leli, un dos nomes máis coñecidos no mundo do narcotráfico no Sur de Galicia. Esta célula da Mafia Albanesa, que contaba con colaboración directa con persoas das provincias de Pontevedra e Ourense, centraba os seus esforzos en manter cultivos intensivos indoor que lle permitisen abastecer de xénero a clientes de distintos países europeos.
Xa no mes de marzo, os axentes policiais desmantelaran un laboratorio interior na localidade ourensá de Pereiro de Aguiar. No mesmo interviñéronse miles de plantas e inflorescencias de cannabis sativa. Os funcionarios da Comisaría Provincial de Pontevedra continuaron coa investigación baixo a dirección do Xulgado de Instrución número 2 de Ourense, e foi iso o que lles permitiu chegar ata a nave industrial da parroquia de Mourente, onde a principios de novembro levaron a cabo unha nova incautación, esta vez de máis de dúas mil plantas de marihuana que arroxaron un peso bruto de 500 quilos, numeroso material eléctrico, equipos de extracción, documentación e teléfonos móbiles que foron clave para o avance das pescudas.
Manipulación xenética
O día 8 de novembro e como continuación directa da investigación iniciada no principio do ano na localidade da provincia veciña, e grazas á información obtida entón, a Policía estableceu un dispositivo que permitiu levar a cabo a entrada e rexistro na nave industrial situada moi preto da igrexa de Mourente e na que se ocultaba un gran laboratorio profesional para o cultivo intensivo. Dotado dunha potente instalación eléctrica, de illamento e de extracción, valorada segundo os expertos en 85.000 euros, alí manipulábanse xeneticamente as plantas co obxecto de conseguir un maior rendemento a cada unha delas, obtendo catro colleitas ao ano cun beneficio anual próximo a un millón de euros.
Nesa segunda fase da operación detivéronse a catro persoas, que se suman a outras tantas que xa foran arrestadas en marzo e que seguen en prisión. O interior da nave de Mourente, ao igual da de Ourense, estaba especialmente deseñado para o cultivo intensivo, compartimentado en dúas estancias duns 250 metros cadrados cada unha elas deseñada ad hoc e dotada coas últimas tecnoloxías en domótica e sistemas de cultivo para acelerar o réxime natural de crecemento e floración.
A instalación contaba con aparellos de ventilación e filtros de carbono para depurar o cheiro, ademais dun avanzado sistema de iluminación con preto de 300 lámpadas cos seus respectivos transformadores, control de fotometría, temperatura, humidade, medidores de PH que variarían os parámetros en función ao momento do desenvolvemento das plantas, así como gran cantidade de produtos fertilizantes.
O balance provisional da operación sinala a destrución de preto dunha tonelada de plantas e restos vexetais de marihuana, o desmantelamento das dúas instalacións eléctricas e de extracción de fumes cun valor aproximado de 250.000 euros.
Entre os detidos este luns, segundo sinala a Udyco de Pontevedra, áchanse os máximos responsables do cargamento. Os seus clientes achábanse en España, pero tamén noutros países de Europa, principalmente en Holanda.
