O incendio que arrasou unha nave industrial e afectou a tres embarcacións nos Estaleiros de Praceres (Lourizán) quedou "totalmente extinguido". As chamas, detectadas na madrugada do sábado, chegaron a reavivarse á primeira hora de onte pero, segundo explicaron despois fontes das forzas de seguridade, o lume foi sufocado con certa celeridade polos Bombeiros desprazados ao lugar do suceso. Como consecuencia, a media mañá os servizos de urxencias puideron dar por finalizad a súa intervención logo de sufocar os últimos focos e arrefriar a zona.
O incendio, do que aínda se descoñece a súa orixe, calcinou por completo dous barcos que estaban en proceso de reparación -Mar do Rostro e Praia do Esteiro-, afectou a un terceiro e arrasou unha nave industrial de 2.000 metros cadrados. Non se rexistraron danos persoais, dado que na zona só se atopaba un vixiante de seguridade da Policía Portuaria, que foi o que deu a voz de alarma ao ver gran cantidade de fume. Con todo, os danos materiais son cuantiosos e, de feito, están pendentes dunha valoración definitiva.
O incendio suscitou unha gran expectación cidadá e máis dun veciño pasou a noite en vela pendente da evolución das chamas. Moitos chamaron ao 112 da Axencia Galega de Emerxencias dando aviso do lume e das explosións que se vían a ambos os dous lados da ría nesta zona portuaria.
INVESTIGACIÓN. O incendio declarouse sobre as 00,00 horas da madrugada deste sábado e deu lugar á activación dun operativo complexo. O incendio mobilizou a Bombeiros, Policía Nacional, Local, Protección Civil, Garda Civil e varias dotacións de bombeiros de Pontevedra, O Morrazo, O Salnés, Ribadumia, Vigo e O Porriño. As características do incendio levaron a activar o nivel 1 de urxencia do Plan Territorial de Urxencias de Galicia por incendio industrial (neste caso por verteduras contaminantes), de maneira que, entre outras medidas, despregáronse barreiras na zona para evitar que os residuos afectasen o medio ambiente.
Ademais, incorporáronse ao operativo os buques Sar Gavia e Irmáns García Nodal de Salvamento Marítimo para apoiar os labores de extinción desde o mar dado que, segundo precisou nese momento o presidente da Autoridade Portuaria, José Benito Suárez Costa, "desde terra non se podía acceder ata a cola do estaleiro, que é moi longo".
Unha vez que as chamas estivesen controladas deixouse paso aos axentes da Policía Científica, que continúan investigando a orixe e causas do incendio. En principio, as confrarías teñen previsto continuar este luns coa súa actividade e mariscar nos bancos de Praceres.
