O Ministerio de Defensa pechou o pasado día 18 o segundo e último ciclo do proceso selectivo 2020 para o ingreso como Militar Profesional da Escala de Tropa e Mariñeiría das Forzas Armadas. Para este segundo ciclo do ano, o Centro de Selección da Subdelegación de Defensa recibiu 320 solicitudes para tomar parte no proceso.
Finalizado o mesmo, 62 pontevedreses obtiveron praza e tamén foron elixidos no Centro de Selección de Pontevedra un total de 12 solicitantes procedentes da provincia de Ourense, que fan un total de 74 seleccionados. Deles, 56 irán a unidades do Exército de Terra, 8 á Armada e 10 ao Exército do Aire.
Coa adxudicación das prazas deste segundo ciclo, o Ministerio de Defensa dá por concluída a convocatoria anual para acceder como Militar de Tropa e Mariñeiría, condicionada inevitablemente polas medidas de seguridade para reducir a probabilidade de contaxio por covid-19.
As 74 prazas agora asignadas únense ás 66 do primeiro ciclo do ano para arroxar o dato dun total de 140 cidadáns que superaron o proceso selectivo no Centro de Selección de Pontevedra. O Ministerio de Defensa prevé o anuncio dunha nova convocatoria nos primeiros meses do ano 2021.
As Forzas Armadas, segundo a Subdelegación de Defensa, proporcionan unha "profesión de futuro onde se poden continuar os estudos, xa que se obteñen títulos do Sistema Educativo Xeral (de Grao para as escalas de oficiais e de Técnico Superior nas escalas de suboficiais). Seguimos a disposición dos centros educativos para informarlles sobre a profesión militar".
