Tres vivendas situadas na parroquia de Campañó sufriron na madrugada do venres un asalto nocturno que levou a preocupación aos habitantes desta zona do rural. Nunha das casas os delincuentes apoderáronse dunha moto (que foi recuperada pola Garda Civil) e dun bo número de ferramentas de uso agrícola e bricolaxe cuxos propietarios están convencidos de que o seu destino foi o poboado do Vao.
Os feitos, que se rexistraron no núcleo do Ribeiro, foron denunciados este venres na Comisaría Provincial de Policía pola familia máis prexudicada pola actuación dos ladróns cuxa identidade se descoñece á espera de que a investigación poida dar os seus froitos.
"Entraron no noso galpón pola zona das leiras para non ser vistos e apoderáronse de todas as ferramentas, entre elas unha rozadora e un cepillo eléctrico", subliña un portavoz da familia. Tamén recorda que xa sufriran con anterioridade "dúas ou tres roubos" de menor entidade. "Tiveron que usar un coche para transportar todo o material do que se apoderaron".
O representante da familia indica que só puideron recuperar unha motocicleta que foi atopada por unha patrulla da Garda Civil nun lugar próximo ao Vao e devolta aos seus donos. Ao parecer os ladróns ocultaran o vehículo coa intención de levalo ao amencer ao poboado do Vao coa intención de vendelo.
LÉREZ. Doutra banda, a Policía Nacional investiga un intento de roubo a plena luz do día nunha vivenda da parroquia de Lérez, no lugar de Ramallás, rexistrado este xoves.
