As denuncias telefónicas por acoso escolar soben un 70% no último ano

A visibilización do acoso escolar aumenta grazas ás campañas para a súa prevención emprendidas por colectivos e institucións, segundo os datos achegados por diversas entidades. É o caso do Teléfono ANAR de Axuda a Nenos e Adolescentes, que atendeu case un 75% máis de casos no último ano. A cifra se cuatriplicó desde 2009, segundo o primeiro estudo que analiza o fenómeno do bullying desde a perspectiva dos menores afectados, realizado pola Fundación ANAR e a Fundación Mutua Madrileña. O Teléfono ANAR de Axuda a Nenos e Adolescentes e o Teléfono ANAR do Adulto e a Familia atenderon en 2015 ao redor de 25.000 chamadas de nenos e pais relacionadas con este problema en toda España.

Segundo a análise do testemuño dos mozos, o acoso escolar máis habitual é a violencia psicolóxica e adoita agravarse á saída das aulas a través das novas tecnoloxías. As redes sociais, e especialmente os grupos de WhatsApp creados especificamente para criticar e insultar, convertéronse, segundo os datos, nun novo instrumento para o bullying. A proporción de nenos e nenas que di sentirse acosado polos seus compañeiros é case idéntica (49% e 51%, respectivamente) e a idade máis habitual á que se padece acoso son os doce e trece anos. Entre os motivos que o desencadean, os menores citan a marxinación por ser diferentes, discapacidades, defectos físicos, ser pouco abertos ou habilidosos nas relacións sociais e non seguir as mesmas tendencias ou gustos da maioría.

Un 34% dos menores recoñece non haberllo contado aos seus pais por non preocuparlles e polo medo a unha reacción esaxerada do colexio ou dos acosadores.

CIBERBULLYNG. O ciberbullying representa xa un de cada catro casos de acoso escolar. Esta proporción aumenta coa idade, de forma que a partir dos 13 anos o 36,5% dos casos de bullying son por ciberacoso. O 70% da vítima son mozas. O estudo realizouse a partir da análise da base de datos das 60.408 chamadas atendidas entre 2013 e 2015. Entre elas identificáronse e seguiron 1.363 casos de bullying.

A nivel local, unha enquisa realizada pola Federación de Asociacións de Nais e Pais de Alumnos de Pontevedra (Fanpa) na que se analizaron 313 respostas revelou que o acoso escolar afecta a unha parte substancial da comunidade, aínda que adoita ser un problema temporal do que os pais nunca son informados o centro. Case un 40% dos entrevistados di coñecer casos, aínda que a maioría nunca o sufriron, mentres un 20% si recoñece ser vítima.

O acoso escolar en Pontevedra é de carácter verbal, sucede na aula e en tres de cada catro casos o colexio non actúa de oficio. Os proxenitores afirman que as consecuencias son basicamente emocionais e sociais, pero tamén repercusións académicas negativas.

A Consellería de Cultura e Educación puxo en marcha en 2013 o Protocolo para a prevención, detección e intervención en acoso e ciberacoso, un documento que converteu a Galicia na primeira comunidade que recolle o tratamento do acoso e do ciberacoso. Este protocolo, agora baixo o paraugas da Estratexia Galega de Convivencia Escolar 2015-2020, recolle os pasos necesarios ante unha posible situación de acoso ou ciberacoso e as diferentes estratexias de prevención.

O 1 de novembro entrou en funcionamento o teléfono contra o acoso escolar: 900 018 018. Está operativo as 24 horas todos os días do ano. As chamadas son atendidas por psicólogos, xuristas, sociólogos e traballadores sociais.