O concelleiro de Desenvolvemento Sostible e Medio Natural, Iván Puentes, asinou este martes a proposta de convenio de colaboración que o Concello de Pontevedra pechará coa Deputación para abrir ao público e dotar dun novo parque a parcela de 5.500 metros cadrados existente na pasarela José Adrio Barreiro, entre as rúas A Estrada e As Hortas.
Doutra banda, a Xunta de Goberno tamén aprobou unha sesión extraordinaria a remisión á administración provincial desta proposta na que se establece que a institución liderada por Carmela Silva asumirá o 100% do financiamento desta actuación. Un proxecto que ascende a 499.998,86 euros.
O edil Iván Puentes explicou que "unha vez que a institución provincial o aprobe na súa Xunta de Goberno, o Concello estará xa en disposición de sacar o proxecto a contratación, previo paso por Xunta de Goberno e obtendo antes a pertinente autorización da Administración de Infraestruturas Ferroviarias (Adif), que xa está solicitada".
