A crise de Nexia Infraestruturas activou as alarmas nunha nova administración, a Deputación de Pontevedra. A súa presidenta, Carmela Silva, informou este maryes de que a institución está agora mesmo examinando os proxectos adxudicados á empresa construtora, cuxas débedas xa ascenden, segundo os acredores, a 8,5 millóns de euros. "Estamos estudando os contratos para tomar decisións, co fin de que isto non afecte ás obras que estaban en marcha nin á prestación de servizos na provincia", manifestou a socialista.
Segundo denuncian provedores e subcontratas, a compañía ingresou no último ano importantes cantidades polas certificacións de obra que foi xustificando, pero sen liquidar aos acredores, que achegaron medios, maquinaria e persoal cos seus propios recursos. Isto, sumado ás débedas contraídas cos subministradores de material, provocou a paralización de varias obras públicas que a firma tiña adxudicadas.
A maior parte dos contratos vinculados coa institución provincial son por obras en distintos concellos da provincia con cargo ao Plan Concellos, que este ano ten previsto financiar investimentos municipais por un importe de 29,7 millóns de euros.
A firma foi vendida o pasado venres 17 de xaneiro a unha pequena sociedade que, segundo afirman fontes próximas, dedícase ao aluguer de maquinaria e ten sede social en Salvaterra do Miño. Pablo Valiñas Monteagudo presentou ao novo responsable, Javier López, como o representante dunha empresa solvente, pero as dúbidas non tardaron en xurdir. Sobre todo cando, segundo os traballadores, anunciou que contrataría unha auditoría catalá para examinar o estado das contas, tras facer efectiva a compra.
RESCISIÓNS. Os concellos de Pontevedra e Poio tamén se puxeron ao choio para solucionar a paralización dos traballos adxudicados a Nexia. No caso do segundo, fontes oficiais confirmaron este martes que o prazo outorgado á empresa para que facilitase información sobre as obras pendentes "expirou sen que houbese noticias pola súa banda". Como consecuencia, a Administración municipal ha iniciado "os trámites pertinentes" para rescindir os contratos, que comprendían a construción dun novo viario na Caeira, a humanización do núcleo da Seara e a rehabilitación do Camiño Lameiriña (Raxó), que nin sequera empezou. A medida implicará volver licitar as obras, co consecuente atraso respecto das datas previstas.
No caso de Pontevedra a obra comprende a rehabilitación dos accesos ao Rial, Rorís e Meán (sitos en Lourizán) e foi adxudicada á empresa por 101.278 euros, 51.456 menos polo que saíu a obra a licitación. Os traballos pararon antes de Nadal e non volveron a ser retomados, o que suscitou numerosas queixas por parte dos veciños afectados.
A empresa tiña ata as 23.59 horas do martes para comunicar a súa folla de ruta prevista, pero non consta que faga o trámite. Por iso, a Administración local estudará que medidas adoptar, entre as que se contempla a rescisión de contrato e incluso o veto da sociedade no departamento de Contratación para que non volva executar ningunha outra actuación municipal.
O Concello de Vilagarcía xa deu o paso e rescindiu o contrato das obras de humanización de Vázquez Leis pola "prolongada demora" que arrastraba a actuación. E en Pontecesures presúmese que o novo parque infantil e as novas beirarrúas tamén se pasarán de data.
O caso superou incluso as fronteiras de Pontevedra, posto que a Deputación da Coruña non descarta anular a ajdudicación a Nexia da ampliación da estrada de Besta (Oleiros) e a construción dunha nova ponte en Lousame. Ambas as obras atópanse paradas e as subcontratas advertiu que levan "meses sen cobrar".
Mentres tanto, o grupo de acredores afectados, que prevé formar unha asociación e depurar responsabilidades pola vía penal, suma novas incorporacións. O martes xa eran 37, aínda que calculan que en total Nexia debe facturas a 300 provedores e empresas prestadoras de servizos.
