O grupo de infraestruturas, auga e enerxía Lantania iniciou a tramitación de catro parques eólicos de máis de 150 megawatts de potencia en Galicia, tres na provincia da Coruña e un en Pontevedra, cun investimento de 146 millóns de euros, informa a entidade.
O investimento para estes proxectos executarase durante os próximos tres anos, sendo o prazo estimado no que teñen previsto alcanzar a súa operativa comercial, detalla a compañía nun comunicado.
Do mencionado importe, 33 millóns de euros estarán destinados a melloras de infraestruturas e obra civil nos parques mentres que 4,5 millóns serían impostos municipais e 4 irán dedicados a gastos de desenvolvemento de proxectos técnicos con enxeñerías e especialistas locais. Adicionalmente a estes importes de execución, os proxectos contemplan un investimento en aeroxeradores valorada en máis de 105 millóns de euros.
O obxectivo da compañía é que os trinta aeroxeradores que serán necesarios para estes 150 MW sexan fabricados en Galicia, polo menos fustes e pas, o que suporía un volume adicional por encima dos 45 millóns para a industria da rexión, sosteñen
