As policías Local e Nacional puxeron o lazo á operación Santo coa detención dun individuo que supostamente dirixía un narcopiso na rúa San Antoniño, en pleno centro da Boa Vila.
As constantes denuncias veciñais polo suposto trapicheo que se producía en torno ao lugar desembocaron en numerosas vixilancias dos axentes, que constataron a gran afluencia de mozas que realizaban contactos breves sen motivo aparente. Iso facilitou as primeiras incautacións, que incluíron doses de hachís, marihuana, cocaína e MDMA, indicios máis que suficientes para levar adiante unha investigación en profundidade co obxectivo de coñecer a orixe exacta das sustancias e, se fose posible, o arresto dos seus responsables.
Así, a combinación de esforzos entre o Grupo SAI da Policía Local e o Grupo de Tráfico de Medio de Estupefacientes da Comisaría Provincial serviu para identificar ao sospeitoso, un veciño de Pontevedra de 25 anos que foi detido por un presunto delito contra a saúde pública na súa modalidade de tráfico de sustancias estupefacientes.
No consecuente rexistro do narcopiso, previa autorización xudicial, os axentes acharon catro teléfonos móbiles supostamente empregados para a actividade ilícita á que se dedicaba o investigado. Atoparon, ademais, 1.500 euros en billetes de distinto valor, presuntamente produto das ganancias das centas de drogas, unha báscula de precisión, sustancia de corte para adulterar a droga e distintas cantidades de todas os estupefacientes anteriormente descritas.
