A choiva que caeu sen cesar durante este sábado no municipio, provocou a acumulación de bolsas de auga nalgunha calzada e o desprendemento de terra na parroquia de Verducido.
A estación meteorolóxica de Campolongo xa recollera na tarde deste sábado 36,2 litros por metro cadrado desde a medianoite, mentres que na de Lourizán rexistráronse 33,2 litros por metro cadrado e na do Castrove 27,4, segundo a información publicada por Meteogalicia, dependente da Consellería de Medio Ambiente.
Aínda que o vento empezou o día frouxo (de dirección variable), co avance da xornada foi moderado (de compoñente norte).
Operarios da empresa Viaqua solucionaron o problema que durante a mañá rexistrouse na avenida de Bos Aires, causado por unha gran bolsa de auga que dificultaba a circulación de vehículos. Aínda que nun primeiro momento o Servizo de Emerxencias 112 dera aviso aos Bombeiros, finalmente non foi necesaria a súa intervención.
Ante a posibilidade de que continúen as precipitacións con certa intensidade en Pontevedra, os servizos de urxencia recomendan prudencia ao volante e axustar a condución ás condicións da calzada.
As choivas provocaron o derrube sobre a calzada de parte dunha ladeira en Verducido, en concreto no lugar de Rosende. O desprendemento de terra e pedras obrigou aos condutores a circular coa máxima precaución. Directivos da asociación de veciños Outeiro do Castro alertaron ao Concello do suceso, que non obrigou a cortar o tráfico.
DOMINGO. O tempo inestable continuará este domingo, segundo os prognósticos de Meteogalicia. "Haberá precipitacións ou domingo pola tarde. Prevense ceos con nubes e claros nas próximas datas, ocasionalmente pouco anubrados ou despexados", precisa.
En concreto, a probabilidade de choiva para esta mañá será do 30%, do 65% pola tarde e do 20% pola noite.
En canto ás temperaturas que se rexistrarán no municipio de Pontevedra, Meteogalicia indica que "serán normais para este período, con mínimas que descenderán moderadamente (ata os 10 graos) e máximas que se manterán sen cambios (alcanzarán os 16 graos)".
