Axentes da Comisaría Provincial de Pontevedra detiveron o luns a un individuo acusado dun presunto delito de malos tratos cometido na vía pública, nas inmediacións da parada de autobuses da Praza de Galicia. Os feitos producíronse, segundo o relato de testemuñas presenciais. moi preto do lugar no que se toma o autocar que une Marín con Pontevedra, nas proximidades das pistas polideportivas.
Varias persoas que se achaban no interior dun deses autocares decatáronse de que se estaba producindo unha discusión subida de ton entre un home e unha muller. No marco da mesma, el agrediría a quen parecía ser a súa parella. Ao mesmo tempo, produto dun gran estado de nerviosismo, o individuo que acabaría sendo detido golpeaba ao mobiliario urbano da zona.
Os policías que se desprazaron ao lugar recompilaron as versións do sucedido dos alí presentes, o que lles levou á procura, identificación e detención do sospeitoso dos feitos, arrestado na rúa Andrés Muruais sobre as 23.00 horas do mesmo día.
O argumento esgrimido polo detido, que foi trasladado ás dependencias policiais de Joaquín Costa, foi que a presunta vítima se atopaba baixo os efectos das bebidas alcohólicas e moi alterada, circunstancia que deberán aclarar as investigacións iniciadas agora na Comisaría.
Os delitos de malos tratos seguen acaparando gran parte do traballo das Forzas de Seguridade e da Fiscalía de Pontevedra. Non en balde, constitúen, xunto aos de tráfico, o maior volume de feitos ilícitos que se investigan na cidade do Lérez de forma cotiá.
