A Policía Local de Pontevedra detivo este martes un home, de 51 anos, como presunto autor dun delito de violencia de xénero despois de que unha testemuña presenciase como agredía á súa parella en plena rúa e a tiraba ao chan. Os feitos ocorreron ao redor das 12.30 horas na Rúa Augusto González Besada. Cando chegou ao lugar a patrulla, os axentes observaron que a muller, de 31 anos, presentaba feridas con sangue en xeonllo e man.
Nun principio a vítima negou que o agresor fose o seu compañeiro sentimental e declarou que se trataba dun descoñecido que intentara roubarlle o teléfono. Pero, unha vez requirida unha unidade médica para atender á muller, os axentes identificaron un home que respondía á descrición facilitada pola testemuña na Praza de Galicia, quen recoñeceu que mantivera unha discusión coa súa parella na citada rúa do centro de Pontevedra.
Os axentes procederon á detención do home por un presunto delito de violencia machista e, nun cacheo superficial, descubriron que levaba un coitelo sen mango de 12 centímetros aproximadamente, escondido na manga dereita da chaqueta que levaba posta. A Policía constatou que a parella vivía xunta.
"Esta detención confirma unha vez máis que a solidariedade e a colaboración cidadá son determinantes para atallar este tipo de delitos. Os delitos de violencia doméstica e especialmente os de violencia de xénero danse nunhas circunstancias tales —relacións afectivas, ambiente de medo, convivencia no mesmo domicilio— que deixan ás vítimas a mercé do delincuente, e outras, que dota a estes feitos dunha natureza moi singular", subliña a Policía no seu comunicado, para facer fincapé na dificultade que en moitos casos teñen as vítimas para denunciar e facer fronte por si mesmas á situación. . "A solidariedade e a implicación da sociedade, así como dos poderes públicos, resultan básicas para afrontar este problema" conclúe.
