A Policía Nacional detivo a dous mozos de 24 anos, ambos os veciños de Vigo, por roubarlle a cartilla bancaria a un pensionista de Pontevedra, ao que ameazaron cunha navalla e déronlle unha malleira ante a súa negativa a entregarlles diñeiro.
Segundo informou este luns a comisaría provincial, o atraco produciuse o sábado nas inmediacións da alameda da cidade de Pontevedra, onde os dous individuos abordaron á súa vítima, á que ao parecer coñecían.
Un deles esgrimiu unha navalla e, de xeito ameazante, esixiulle o diñeiro. Como o pensionista non accedía ás súas peticións, ambos comezaron a propinarlle patadas e puñadas ata que, unha vez en chan, puideron roubarlle a cartilla bancaria que levaba encima porque acababa de cobrar 350 euros da súa pensión.
Tras o asalto, ambos se deron á fuga e foron localizados polos axentes da Policía Nacional na rúa Casimiro Gómez, onde estaban a tratar de roubar no interior dun coche.
Unha vez detidos por un delito de roubo con intimidación, os dous mozos, que teñen múltiples antecedentes por feitos similares, foron postos a disposición da autoridade xudicial.