Manuel E.M., o avogado con despacho en Vigo acusado de liderar unha rede criminal de narcotraficantes, explicou este luns na Audiencia que os seus contactos cos colombianos eran para a creación dunha escola de aviación en España. O letrado negou, en esencia, os feitos que lle imputa a Fiscalía Provincial: a organización da recepción dun alixo de 60 quilos de heroína que incautou o Grupo II da Udyco de Pontevedra en agosto de 2017. A Sección Quinta da Audiencia Provincial de Pontevedra acolleu este luns o inicio da vista oral por aqueles feitos, cunha circunstancia especial: o tribunal encargado de coordinar o plenario formouse a partir das salas Segunda e Cuarta, dado que os xuíces de Vigo resolveran recursos previos sobre o asunto e estarían contaminados.
A vista oral comezou coa quenda de cuestións previas no que, como é costume, os letrados intentaron evitar o xuízo pedindo a nulidade das actuacións. Para iso argumentaron unha presunta investigación prospectiva e puxeron en cuestión a achega dun confidente presuntamente interesado. A presidenta do tribunal, Nélida Cid, tras escoitar a todas as partes, decidiu seguir adiante e tomar declaración aos investigados.
Os avogados intentaron sen éxito que a xuíza ditase a nulidade das actuacións na quenda de cuestións previas
O primeiro en comparecer foi o avogado vigués, que negou unha participación relevante nun e outro alixo, o primeiro, un intento frustrado de cocaína desde Colombia, e o segundo, de heroína que foi abortado en Caldas. Manuel E.M. contou que coñece desde 1996 ao outro presunto xefe, Juan Jesús V.P., alias Juancho, con quen coincidiu ese ano en prisión. Ambos contan con antecedentes e foron condenados en firme por senllos delitos contra a saúde pública. O letrado recoñeceu os múltiples encontros con Juancho, tanto pola súa relación de amizade como porque lle levou varios asuntos ou o asesorou xuridicamente, e dixo que só dúas veces falou co presunto enlace colombiano, Gustavo A.H., e foi para axudarlle para abrir unha escola de aviación en España e para traerse aos seus fillos a Europa. Manuel dixo descoñecer o mote de Jacinto co que se referían a el varios interlocutores, entre eles o suposto contacto colombiano, en conversacións intervidas que reforzarían o seu peso na trama desmantelada.
Juancho, que interveu en segundo lugar, só contestou ao seu avogado para dicir que traballaba como albanel sen declarar os seus ingresos, que o seu amante Gardenia C.V. prestáballe o seu teléfono para falar con outros acusados e que "ignoraba" o que falaba con aqueles. Nun momento do xuízo encarouse co fiscal e logo coa presidenta do tribunal para queixarse de que está no cárcere por culpa dunha resolución "con moitas mentiras".
Gardenia C.V. recoñeceu que lle buscou acomodo nun hotel da Toxa a varios cidadáns colombianos na crenza de que ían abrir unha escola de aviación e que xestionou tamén a posibilidade de alugar unha nave industrial en Cambados.
O xuízo continúa este martes. A Fiscalía pide once anos de cárcere para os doce acusados, a metade galegos e a outra metade búlgaros.
