A pontevedresa Praza da Ferrería recuperou este luns un aspecto que lembra ós tempos prepandemia para abeirar un acto poético-musical co gallo do Día das Letras Galegas. Ducias de persoas déronse cita na emblemática praza da Boa Vila para escoitar os poemas de Xela Arias, escritora homenaxeada no 17-M, na voz das poetas Tamara Andrés, Miriam Ferradáns, Regina Touceda e Elvira Ribeiro, e tamén acompañada da música dos finalistas do certame X Xela.
A ritmo de regueifa, e ante a imaxe e os versos de Xela Arias, que se ían proxectando nunha pantalla, Alba María e Lupe Blanco presentaron un acto que contou coa presenza do fillo da poeta, Darío Gil —na foto—, quen se dirixiu ó público para agradecer unha proposta "tan emocionante" na que a poesía da súa nai inspira as cancións de quince bandas de Pontevedra. "É unha iniciativa moi acaída pola relación da miña nai coa música e a poesía", subliñou Darío Gil.
Quince grupos pontevedreses, que representan a distintas xeracións de músicos galegos, participaron neste certame que propoñía musicar poemas da escritora de Sarria a fin de poñer en valor a súa obra e, ó tempo, "amosar tanto o talento musical que ten a cidade de Pontevedra como que a música en galego abre portas", subliñara o concelleiro de Normalización Lingüística, Alberto Oubiña.
O músico Nacho Mora alzouse co primeiro premio logo de converter en canción o poema Soldados de Xela Arias. Mora é un histórico da música que ten tocado en bandas como Los Covers, Elephant Band o Meu, e conta cun disco autoproducido, Entre as zocas e os lóstregos (2018).
En segundo lugar quedou o grupo Río Verdugo, que musicou o poema de Xela titulado Vide. Finalmente, o terceiro posto foi para a banda Tíbet 1990, nacida ó abeiro do Local de Música de Pontevedra, que se inspirou no poema Indecisión para participar neste concurso.
Durante máis dunha hora os versos de Xela Arias devolveron a poesía e a música a unha Praza da Ferrería chea de vida, iso si, entre importantes medidas de seguridade, aforo reducido e distancia entre os asistentes que tiveron que deixar os seus datos antes de ocupar as súas cadeiras. Moitos máis seguiron o acto na contorna da praza.