Difusión Felina deixou de recoller gatos en Pontevedra. Fíxoo por terceira vez no que vai de ano e ante o aumento de abandonos. O colectivo ten ao seu cargo a 177 felinos: 138 deles acollidos desde xaneiro e os 39 restantes que xa tiñan ao seu cargo.
"Os recursos son limitados, os voluntarios máis aínda, as acollidas son as de sempre e as adopcións escasas", explica o presidente da asociación, Carlos Ferrer, nun comunicado de prensa.
O máximo responsable de Difusión Felina advirte de que na capital provincial ten un "problema moi grande" co abandono deste tipo de mascotas. "Seguimos dicindo que nesta cidade sae moi barato abandonar; que a implicación por parte das autoridades en materia de protección animal é nula e que, mentres isto siga así, seguiremos vivindo con casos diarios de gatos abandonados en bolsas, en colectores e no medio do monte", sinala Ferrer.
