A presidenta da Deputación de Pontevedra, Carmela Silva, lanzou un berro contra a violencia machista no acto de presentación da programación que a institución provincial vai desenvolver con motivo do 25-N, día internacional da eliminación da violencia contra a muller.
"Non imos facer máis minutos de silencio. Estamos fartas do silencio. Nós imos gritar alto e claro e non imos parar ata acabar con algo tan intolerable como os malos tratos que sufrimos as mulleres. Que saiban os machistas, os maltratadores e os asasinos de mulleres que os desprezamos profundamente", dixo a presidenta.
Todas as actividades organizadas pola Deputación de Pontevedra englóbanse baixo a lema 'Emerxencia Feminista. Sitúate fronte ao machismo', ao entender, segundo subliñou Carmela Silva, que "calar é estar ao lado do machismo", polo que "hai que situarse en contra", xa que esa é "a única posición decente".
A campaña provincial arrincou coa instalación de dúas grandes pancartas despregadas nas fachadas das sedes da institución provincial de Pontevedra e Vigo.
No acto da súa colocación celebrado este xoves no Pazo Provincial participaron, ademais de Carmela Silva, o vicepresidente César Mosquera e deputados e deputadas do goberno provincial. As sedes da Deputación iluminaranse en cor violeta desde a noite deste xoves ata finais de novembro.
EN 25 CONCELLOS. Logo da colocación da pancarta, as Ruínas de Santo Domingo acolleron a presentación do resto das actividades programadas, que volven ter o proxecto 'Abrandares en Acción. Violencia Zero' como acto estrela en toda a provincia nesta VIN edición, que contará con 25 accións que se desenvolverán en 25 concellos de todas as comarcas.
As dúas 'performances' inaugurais terán lugar o propio 25 de novembro na praza da Peregrina de Pontevedra, a cargo de Janet Novás, protagonista do cartel deste ano, e o día 26 no Museo Marco de Vigo con Mónica Aranegui.
Doutra banda, no pleno ordinario que celebrará a corporación provincial o día 27 deste mes, a profesora Teresa Domínguez, mestra e exdirectora do CRA Clara Torres de Tui, que acaba de ser galardoado este 2020 co premio Escola do Ano da Fundación Princesa de Xirona, lerá unha declaración da súa propia autoría con motivo do 25N "que falará da importancia da educación nesta loita".
Así mesmo, a Deputación de Pontevedra colaborará un ano máis coa campaña de sensibilización social 'En Negro contra as Violencias', na que participa desde o ano 2017 coa edición de distintos materiais que distribúen nos 25 municipios adheridos na provincia a esta iniciativa.
