A Deputación de Pontevedra constituíu unha Comisión Interdepartamental co obxectivo de elaborar "de xeito participativo" e con visión "estratéxica" unha Axenda Urbana e Rural propia para converter á provincia de Pontevedra nun espazo "máis sostible, resiliente, inclusivo e seguro".
A presidenta da Deputación de Pontevedra, Carmela Silva presidiu este xoves xunto ao vicepresidente provincial, César Mosquera, a reunión de constitución desta comisión que traballará para tender redes con institucións, sectores estratéxicos e o tecido social.
Este equipo estará integrado por persoal dos servizos de Infraestruturas (que coordina a comisión), Mobilidade, Turismo, Medio Ambiente, Cooperación e do Plan Revitaliza.
Con esta iniciativa, a Deputación de Pontevedra segue o camiño que xa iniciaron outras institucións provinciais como Barcelona ou Granada para, como primeiro paso, realizar un diagnóstico da situación da provincia e, a partir de aí, elaborar un documento estratéxico que contemple os principios, obxectivos, criterios e pautas de actuación "para o desenvolvemento sostible e integrador da provincia".
é dicir, distinguirá se se trata de actuacións de carácter normativo, de planificación, de financiamento, de mellora da gobernanza, de transparencia e participación, de intercambio e difusión de coñecemento ou boas prácticas e experiencias.
O plan establecerá unha calendarización das actuacións e marcará os indicadores de avaliación de resultados. Finalmente, a Comisión Interdepartamental de Axenda Urbana e Rural para a provincia tamén valorará a presentación de propostas ao programa de axudas á elaboración de proxectos pilotos de Plan de Acción Local que contempla o Plan de Recuperación, Transformación e Resiliencia do Goberno do Estado.