A presidenta da Deputación de Pontevedra, Carmela Silva, destacou que se contratou o Plan Estratéxico de Turismo 2021-2023, "onde o Camiño de Santiago vai ter un papel moi relevante".
Así o manifestou con motivo da reunión este xoves da Mesa Provincial do Camiño, que celebrou o seu primeiro encontro do ano. Nesta cita telemática participou a presidenta da Deputación de Pontevedra, xunto á directora da Axencia de Turismo de Galicia, Nava Castro; os alcaldes e alcaldesas de Redondela, O Porriño, Silleda, A Estrada, A Guarda, Baiona, Portas, Dozón; as concelleiras e concelleiras de Pontevedra, Vigo, Lalín, Mos, Nigrán, Barro, Tui, Caldas e Valga; ademais do presidente da Asociación de Amigos do Camiño Portugués, Celestino Lores.
Na reunión informouse da participación da Deputación de Pontevedra nun proxecto europeo, que conta cun orzamento de 2,5 millóns de euros, encamiñado á creación dunha rede transfronteiriza dos Camiños do Oeste Peninsular.
No marco deste proxecto a institución pontevedresa vai organizar unha exposición itinerante, que percorrerá diferentes puntos da xeografía estatal e portuguesa e que irá acompañada de conferencias e dunha acción lúdica dirixida á poboación infantil.
A presidenta tamén explicou que está xa contratado o Plan Estratéxico de Turismo 2021-2023, "onde o Camiño de Santiago vai ter un papel moi relevante" e avanzou que se convocarán "a todas as entidades públicas e privadas implicadas" para que presenten propostas e formulen as iniciativas que consideren neste marco.
Ademais, informou de que está en marcha outro Plan Estratéxico, neste caso de Fondos Europeos, para analizar a obtención de fondos procedentes de Europa para promocionar o Camiño de Santiago e dotar de recursos aos concellos polos que transcorre.
No que respecta ás actuacións desenvolvidas, entre outras, detalláronse as iniciativas de roza e seguridade viaria e peonil postas en marcha en vías provinciais polas que transcorre o Camiño de Santiago.
ACTUACIÓNS. Pola súa banda, a directora da Axencia de Turismo de Galicia, Nava Castro, centrouse en explicar algunhas das actuacións impulsadas a través do Plan Director da Xunta, do Plan de Conservación de Albergues, así como os plans de acondicionamento, sinalización e conservación dos itinerarios; para a mellora da acollida dos peregrinos na rede de albergues públicos e no plan de embelecemento e posta en valor do patrimonio do Camiño de Santiago.
Ademais de repasar as actuacións que a Xunta levou adiante en Pontevedra, Nava Castro tamén puxo en valor o Camiño Eurovelo e informou de que en novembro presentarase a reformulación do Xacobeo. "Un traballo vivo no que estamos inmersos e que retoma a esencia mesma do Camiño", apostilou.
Nava Castro comentou que farán copartícipes ao conxunto das administracións implicadas e na que se apostará por propostas culturais vinculadas a espazos abertos, máis locais e centradas na dixital ou en formatos híbridos.
