A presidenta da Deputación de Pontevedra, Carmela Silva, anunciou este luns que "antes de que finalice este ano" a administración provincial aprobará o segundo plan de igualdade e que "moi pronto" dará a coñecer os resultados da avaliación de todos os obxectivos conseguidos desde que se puxo en marcha o primeiro.
Deste xeito, a xunta de goberno da Deputación, celebrada este luns, aprobou a adxudicación do servizo de asistencia técnica que se encargará da negociación, redacción, deseño, aprobación, análise cuantitativa e cualitativa anual e avaliación final do segundo plan, que terá unha vixencia de catro anos.
Carmela Silva recordou que o primeiro foi aprobado por unanimidade en 2017 e que, nestes momentos, está a piques de finalizar o proceso de avaliación dos "moitos aspectos conseguidos" ao longo destes anos.
"Fomos a primeira administración pública en elaborar un plan de igualdade en base a unha auditoría laboral de xénero e cun análise exhaustiva da área salarial do persoal baixo a perspectiva de xénero", destacou a presidenta.
O primeiro plan de igualdade recollía os termos establecidos en todas as recomendacións internacionais, a lexislación estatal e galega, e ampliaba o concepto de discriminación en liña cos obxectivos do Convenio de Istambul.
Tamén foi integrado na cultura da organización, coa finalidade de alcanzar a igualdade real entre mulleres e homes no traballo. A partir de agora, coa posta en marcha do contrato do segundo plan, ábrese un proceso que inclúe desde a negociación, redacción e aprobación ata o proceso de execución, formación e avaliación anual e final.
