A Deputación de Pontevedra iniciará un proceso de selección de persoal para crear unha bolsa de emprego de profesores de compostaxe en prácticas, ao amparo do Plan Revitaliza.
A previsión provincial é realizar 20 contratos en prácticas a partir do mes de xuño, quedando o resto de persoas formadas na bolsa de emprego, para ir atendendo posteriormente ás necesidades do plan provincial de compostaxe.
Ovicepresidente César Mosquera explicou que o proceso de selección do novo persoal para xestionar os centros de compostaxe comunitaria que están instalados na provincia desenvolverase en tres fases.
A primeira contará cun exercicio tipo test, de carácter obrigatorio e eliminatorio sobre residuos orgánicos de orixe doméstica e a organización e funcionamento de concellos e deputacións.
Unha segunda proba consistirá nunha entrevista persoal obrigatoria, pero non eliminatoria e unha terceira centrarase na superación dun Curso de Formación de Mestría en Compostaxe, organizado pola Universidade de Vigo, na denominada pola Deputación Facultade de Compostaxe, durante un prazo de seis semanas.
A duración dos contratos en prácticas será dun ano prorrogable a outro, ata un máximo de dous exercicios, cunha retribución no primeiro ano do 60% do salario do grupo C1 da Deputación (1.092,77 euros ao mes brutos) e do 75% o segundo (1.365 euros mensuais brutos).
Os aspirantes deberán contar co título de Formación Profesional de grao superior como persoal técnico en Xestión Forestal e do Medio Natural, Paisaxismo e Medio Rural, Laboratorio de Análise e Control de Calidade, ou Química Ambiental, entre outros.
O prazo de presentación das solicitudes para participar na convocatoria de selección para a bolsa de emprego é de dez días naturais, contados desde o día seguinte á publicación da convocatoria no Boletín Oficial da Provincia, prevista para este venres.
Ata o momento, a Deputación formou a 33 persoas que desenvolveron un traballo fundamental "para o bo funcionamento do Plan Revitaliza e que finalizaron a súa bolsa entre xuño de 2017 e outubro de 2018".
Na actualidade, continúa a formación doutros 20 profesións, que traballan da man do persoal técnico interino propio do Revitaliza, un staff de seis técnicas e técnicos de xestión e 12 profesores de compostaxe.
