Rafa Domínguez faise valer no seu partido. O presidente do PP local reivindicou este luns o peso do seu equipo na recuperación da Deputación. Asegurou que os resultados das eleccións do pasado 28 de maio na Pontevedra foron "claves para recuperar" a institución provincial.
O líder dos populares considera que o superar ao BNG nos pasados comicios e terse convertido na primeira forza da capital, consolida ao PP pontevedrés como "unha forza política sólida e representativa na provincia".
As declaracións de Domínguez prodúcense no medio da expectación mediática pola persoa que levantará o bastón de mando provincial e substituirá á socialista Carmela Silva á fronte da Deputación. Nas quinielas, tamén mediáticas, soan nomes como o de Luisa Piñeiro ou Marta Fernández-Tapias, así como outras alternativas.
O presidente do PP reuniu este luns á súa xunta e ao seu comité executivo para valorar os resultados das pasadas municipais. Unha semana despois da euforia vivida no seo da formación de dereitas, Domínguez sostén que o 28-M foi "un estímulo para seguir avanzando e consolidar un proxecto político sólido e orientado cara ao progreso e o benestar de todos".
"Esta reunión foi unha oportunidade para reflexionar e valorar os resultados obtidos nas eleccións municipais. Agradecemos o apoio de todos os cidadáns que depositaron a súa confianza no Partido Popular e asumimos con responsabilidade o compromiso de traballar polo desenvolvemento e o benestar do noso municipio e provincia", sinalou o tamén xefe da oposición no Concello a través dun comunicado de prensa.
O líder dos populares dá por feito que seguirá catro anos máis fiscalizando á esquerda no Goberno local. De feito, sostén que tanto BNG como PSOE chegarán a un acordo para seguir gobernando a capital das Rías Baixas no próximo mandato, que empezará o 17 de xuño.