Trátase do primeiro operativo no que participan de forma conxunta os tres principais corpos policiais. A voz de alarma deuna a Policía Local ao detectar movementos sospeitosos de pequenos narcotraficantes, especialmente na contorna de Lérez, onde se inspeccionou unha das vivendas investigadas e detívose a, polo menos, unha persoa de etnia xitana.
Tirando do fío, os axentes descubriron que o armazón delituoso era moito máis extenso e os seus tentáculos chegaban ao veciño municipio de Poio e incluso aos barrios vigueses de Teis e Samil. é neste momento cando entran en escena os efectivos de Policía Nacional e Garda Civil, para coordinar as investigacións e decidir unha intervención conxunta.
O despregamento comezou á primeira hora do mércores e contou co reforzo aéreo dun helicóptero da Benemérita, que durante toda a mañá sobrevoou as distintas zonas de actuación.
Ademais da xa citada casa de Lérez –onde a Policía Local practicou un dos arrestos–, inspeccionáronse outras tres vivendas en Campañó, Poio e Campelo, contando nestas dúas últimas intervencións co apoio da Policía Local do veciño municipio.
Seguindo as directrices do Xulgado de Instrución número 3, a Policía Xudicial da Garda Civil practicou outros cinco arrestos, co que os seis sospeitosos pasaron a noite nos calabozos da Comandancia, á espera do seu pase a disposición xudicial. No exterior, un nutrido grupo de familiares e amigos de etnia xitana testemuñábanlles o seu apoio.
Mentres tanto, axentes da Policía Nacional efectuaron outras seis detencións en distintas localizacións de Vigo, que se viron acompañadas por inspeccións nas moradas dos sospeitosos.
A operación segue aberta e non se descartan novos arrestos nas próximas horas.