O fiscal antidroga, Pablo Varela, pediu unha condena de cinco anos de cárcere e unha multa de 20.000 para Jose Antonio R.C., un arousán que foi detido pola Garda Civil a finais de xullo de 2017 tras ser descuberto polos axentes arroxando un paquete con 150 gramos de heroína ao atoparse cun control na Autovía do Salnés.
Este xoves celebrouse o xuízo na Sección Segunda da Audiencia de Pontevedra e o acusado, respondendo unicamente ás preguntas do seu avogado, asegurou que se baixou do coche para ouriñar.
Como proba, achegou unha multa que lle foi posta por esta circunstancia ao baixar do seu vehículo en plena autovía sen vestir o chaleco reflector e por non pór a sinalización oportuna.
Con todo, os axentes que formaron parte deste control de tráfico explicaron á Sala que o 31 de xullo de 2017, pouco antes das sete da tarde, o acusado conducía pola Autovía do Salnés nun Audi A3 cando advertiu a presenza do control policial.
Os axentes viron como este individuo detiña o vehículo e se baixaba para arroxar un paquete á maleza. Os cans da unidade cinolóxica da Garda Civil, que formaban parte do control, localizaron o paquete entre unhas matogueiras.
Tras a análise do contido, revelou ser 150 gramos de heroína, cunha pureza do 28,3 por cento. A peritaxe sinala que a referida droga tería un valor de algo máis de 8.000 euros no mercado negro.
