A asociación de veciños Eduardo Pondal converteu este sábado a Praza da Curtidoira nun gran taller de manualidades ao aire libre. A entidade que preside Luis Carballo Espiña organizou a segunda 'Xornada de labores na rúa', unha iniciativa que se desenvolveu baixo a lema "Ocupa as túas mans, libera a túa mente".
Segundo explica Begoña Mallo, portavoz da agrupación veciñal, "entre os obxectivos máis importantes que queremos acadar con esta xornada está poñer en valor o traballo feito a man. Parece que facer ganchelo, calceta ou coser son cousas do pasado que tan só serve para manter ocupada á xente que non ten nada que facer pero -puntualiza- en realidade ten a finalidade de aproveitar o tempo, aforrar cartos e crear arte coas mans. Que máis pódese pedir!".
A Curtidoira tamén foi un lugar de encontro e convivencia entre distintas entidades do municipio. "A xornada permitiunos ás distintas asociacións poñernos en contacto, coñecernos e compartir as experiencias que adquirimos nas actividades que levamos a cabo", subliña Begoña Mallo.
Outra das finalidades do encontro foi, engade a portavoz de Eduardo Pondal, "dar importancia ao pequeno comercio, negocios que non só venden fíos e agullas, senon que ademais preocúpanse de ensinar os distintos usos que se lle pode dar".
