Educación Infantil convértese no sexto grao do campus de Pontevedra en pechar matrícula para o curso 2018-2019, segundo os datos facilitados este martes pola Comisión Interuniversitaria de Galicia (CIUG). Faio no cuarto chamamento e cunha nota de corte de 7,700, lixeiramente inferior á do curso pasado (7,750).
Esta carreira súmase ás cinco que xa pecharon as súas portas no mes de xullo: Belas Artes, Ciencias da Actividade Física e do Deporte, Comunicación Audiovisual, Educación Primaria e Publicidade e Relacións Públicas.
Deste xeito, o campus de Pontevedra xa terá cubertas 525 das 715 prazas ofertadas, sumando as que se pon a disposición nestes seis graos.
Aínda queda aberta a convocatoria para titulacións de alta demanda como Enfermería e Fisioterapia, que en anos anteriores afacían pechar a súa matrícula en xullo. As notas de corte son, respectivamente, de 9,743 e 10,514.
Tamén quedan vacantes nas carreiras que habitualmente non completan as súas prazas: Enxeñería Forestal, que ten un 5,100 como nota de corte (o curso pasado matriculáronse 16 alumnos para 45 prazas); e Dirección e Xestión Pública. Neste caso hai dúas modalidades: a presencial, con 20 prazas, e a semipresencial, con 25. Ambas teñen un cinco de nota de corte.
Os estudantes que sexan admitidos nesta convocatoria poderán matricularse desde este mércores e ata o vindeiro venres, día 31. Aqueles que aínda non conten cunha praza para o próximo curso poderán ser convocados en futuras listas que serán publicadas o 5 e 10 de setembro, e o 4 e 11 de outubro.