A Consellería de Educación anunciou este venres, tras coñecerse o fallo xudicial que ordena a reapertura da aula de primaria da escola unitaria de Verducido, que acata a sentenza e pon en marcha os mecanismos para cumprila.
A administración educativa, que ten previsto contactar coas familias afectadas o vindeiro luns, iniciará os trámites para cubrir a praza de profesor e proceder á apertura da unidade para escolarizar aos alumnos que solicitaran praza no centro.
A decisión de Educación produciuse horas logo de coñecerse que o Xulgado Contencioso-Administrativo número 1 de Pontevedra obrigaba a reabrir a unidade que pechou este curso ao non chegar ao mínimo esixido de matrículas.
O xuíz estima así o recurso presentado polo presidente da Anpa da escola, así como polos pais de catro nenas que o pasado setembro non foron aceptadas nesta escola porque, segundo Educación, esa unidade de ensino non estaba habilitada.
O fallo xudicial obriga á Xunta a dotar ao centro dos "medios necesarios", nun prazo máximo de dez días desde que a sentenza sexa firme, para que as nenas poidan recibir durante este curso educación primaria nesta escola rural.
Na súa resolución, contra a que cabe recurso de apelación, o xuíz sinala que a "actuación material" da Consellería de Educación é "incompatible" co dereito fundamental á educación, pois suprimiu "de facto" a unidade de educación primaria logo de finalizar o prazo de matrícula.
Ademais, censura que non se instruíse previamente un procedemento administrativo con audiencia aos afectados, que non se lles notificase unha resolución "definitiva e motivada" ou que non se lles concedese un prazo para elixir outro colexio alternativo e matricularse nel.
O titular do xulgado destaca que "non se nega a posibilidade" de que a Xunta, no exercicio "lexítimo" da súa potestade organizativa en materia educativa, deshabilite unidades de primaria nos núcleos rurais "se se manifestan as condicións necesarias para iso". Con todo, advirte de que esas decisións deben cumprir previamente unha serie de formalidades "procedimentales mínimas".
