Pont-Up Store incorporará na súa próxima edición unha nova categoría para recoñecer o traballo das empresas xurdidas no contexto da covid-19. Serán oito firmas de diferentes sectores, entre os que destaca a innovación tecnolóxica aplicada á mobilidade. Así, a empresa Evourbe vai presentar un sistema intelixente de xestión de aparcadoiro e, Vin&Go lanza un proxecto de mobilidade sostible mediante unha subscrición a motos eléctricas intelixentes.
O sector da alimentación tamén aproveita para crear novos negocios que xorden para cubrir ocos que aínda contan con pouca oferta. Namelaka, por exemplo, prepara xeados e sobremesas con sabores novos, A Vanetta ofrece alimentación vegana e de proximidade, Terra de Alebrijes propón unha tortillería tradicional mejicana e Essenzo Cacao ofrece un Chocolate Bean to Bar feito a man en Galicia.
Entre as liñas de negocio con compromiso ambiental foi seleccionada Benestar Market, un espazo en liña para comprar produtos sostibles.
No ámbito cultural, foi seleccionada Galpón Lab, unha asociación sen ánimo de lucro que dá apoio a artistas emerxentes, e Festigaleiros, unha ferramenta en liña para atopar eventos musicais en Galicia.
Para rematar, As Flores de Greta, que xa participara no encontro con deseños de moda mediante estampados naturais, volverá para mostrar as novidades na súa técnica.
á convocatoria para empresas nadas ou reinventadas durante a pandemia presentáronse máis de cinco candidaturas por cada praza dispoñible, o que a converte nun éxito.
Máis aló desta categoría, participarán na feira 41 startups galegas, 36 con posto propio e cinco con actividades na carpa. O evento terá lugar os días 24 e 25 de setembro logo de haberse suspendido o ano pasado con motivo da pandemia.
