Ence atrasou tres meses a presentación dos seus resultados do primeiro semestre polas implicacións que a sentenza da Audiencia Nacional anulando a prórroga concedida á súa fábrica de Pontevedra poida ter nas súas contas.
Así, as contas non as presentará a próxima semana, como estaba previsto, senón o 28 de setembro, segundo informou a compañía este venres á Comisión Nacional do Mercado de Valores (CNMV), aínda que o 28 de xullo, despois do peche do mercado, informará das principais magnitudes operativas dos primeiros seis meses de 2021.
O pasado 16 de xullo, a Audiencia Nacional anulou a prórroga de 73 anos concedida polo Goberno presidido por Mariano Rajoy (2011-2018) a fábrica da compañía en Pontevedra, estimando así os recursos presentados polo Concello de Pontevedra e a organización ecoloxista Greenpeace.
No primeiro trimestre, Ence perdeu 9,6 millóns de euros, un 18,4% menos que no mesmo período do ano anterior, grazas á recuperación do prezo da celulosa, mentres que os seus ingresos caeron un 9% ata os 167 millóns.
