Ence investirá case dous millóns de euros na parada anual de mantemento que realizará entre os días 15 e 25 de marzo na súa fábrica de Pontevedra.
A compañía explica nun comunicado que aproveitando este parón produtivo incorporará novas tecnoloxías ás súas instalacións para "reforzar a súa eficiencia, fiabilidade e excelencia ambiental".
Este investimento destinarase ao mantemento da fábrica pontevedresa e a medidas para mellorar a eficiencia das súas instalacións.
Nestes traballos participarán as preto de 400 persoas que traballan directamente para a compañía en Pontevedra e outras 700 persoas que acudirán á planta para realizar labores relacionados con esta parada técnica.
Para iso, Ence aplicará un protocolo de seguridade fronte á covid-19 e, entre outras medidas, tomarase a temperatura aos traballadores, entregaranse máscaras FPP2, controlarase o acceso mediante unha aplicación móbil e faranse test de antígenos cada catro días.
Os traballadores estarán distribuídos en grupos burbulla, limitándose o contacto entre eles e garantindo as distancias de seguridade, aseguran desde a compañía.