O consello de administración de Ence trasladou aos seus traballadores que seguirá realizando o "maior esforzo" para defender a continuidade da súa fábrica en Pontevedra.
O máximo órgano de goberno da empresa reuniuse en Pontevedra co persoal e transmitiulle o seu apoio ante o momento "delicado" e de "incerteza" que atravesa a compañía ante os recursos presentados na Audiencia Nacional contra a prórroga recibida polo Goberno de Mariano Rajoy.
O presidente da compañía pasteira, Ignacio Colmenares, agradeceu aos seus empregados que todo o equipo da fábrica estea a empregarse "a fondo" para lograr "bos resultados" en materia de sustentabilidade e excelencia ambiental.
Este "esforzo", sinalou Colmenares, súmase ao "folgado" cumprimento da normativa europea, estatal e autonómica e ao "exhaustivo e continuado" control das emisións e do efluente que asegura a calidade das augas da ría de Pontevedra.
A este respecto, o presidente de Ence asegurou que á espera da resolución dos tribunais ás causas abertas contra a concesión da fábrica de Pontevedra "non hai mellor modo" de defender a "importancia" da súa actividade que cumprindo "rigorosamente" coa normativa e levando a cabo un traballo "excelente" na factoría.