A empresa Ence asegura que a marcha deste domingo convocada pola Asociación pola Defensa da Ría (APDR) para rexeitar a permanencia da factoría na ría reuniu un volume de persoas "moi inferior" ao alcanzado pola manifestación desenvolvida no pasado abril a favor da continuidade da planta de celulosa e que esta a superou "amplamente". A empresa asegura que se mobilizaron entón preto de 20.000 persoas.
A través dun comunicado, a compañía asegura, de feito, que esa foi "unha das maiores manifestacións que se lembran na cidade do Lérez", nun chamamento que subliña que tiña como obxectivo defender os "5.100 empregos que dependen da planta de Ence.
Fronte ás críticas, a empresa asegura que a actividade da súa planta "cumpre de maneira rigorosa a máis esixente normativa ambiental, española e europea" e que "non afecta de ningún xeito á calidade da auga da ría de Pontevedra". Recalca, ademais, que non existe outro emprazamento viable nin económica nin tecnicamente en Galicia para recolocar a planta de Lourizán.
