A publicidade da empresa Ence supuxo un 1,4% dos ingresos publicitarios totais da Corporación de Radio e Televisión de Galicia (CRTVG) nos últimos doce meses, entre abril de 2018 e abril de 2019. O dato foi apuntado polo director do ente, Alfonso Sánchez Izquierdo, en resposta a unha pregunta do BNG na comisión permanente non lexislativa de control da corporación, na sesión celebrada este mércores no Parlamento de Galicia.
"Á pregunta de canto representa no conxunto dos ingresos publicitarios, a publicidade de Ence supón o 1,4% dos ingresos publicitarios totais da CRTVG nos últimos doce meses", asegurou. No entanto, rexeitou ofrecer datos máis precisos da publicidade pagada por Ence ou cifras comparativas con anos anteriores, debido a que podería "vulnerar" a confidencialidade entre empresa e anunciante.
Aínda así, ante o seu "recoñecemento" ao dereito ao acceso á información e á transparencia, Sánchez Izquierdo puxo a disposición da deputada nacionalista Olalla Rodil a información dispoñible sobre a publicidade da compañía pasteira, que conta cunha planta situada na ría de Pontevedra.
Ante a pregunta da parlamentaria sobre a publicidade realizada por Ence no programa Luar, ao entender que podería vulnerar os criterios establecidos na TVG, o director do ente defendeu que "non era emprazamento de produto" e se trataba de publicidade "claramente expresada e reflectida". Ademais, explicou que cumpría coas normas reguladoras e que este tipo de publicidade é habitual en programas de prime time, como Luar e Land Rober. En canto ás cifras, sinalou que a publicidade en concreto realizada en Luar por Ence responde a unha tarifa estipulada de 4.000 euros por un espazo de 45 segundos.
