A cidade da capital finalizou 2021 co 16,2% dos pontevedreses que están en idade de traballar en paro, unha porcentaxe que de todas as grandes urbes galegas só supera Ferrol (22%).
O dato arróxao a última publicación da Enquisa de Poboación Activa (EPA), unha investigación trimestral que realiza o Instituto Nacional de Estadística para pulsar o estado do mercado de traballo e cuxa serie histórica demostra que se trata do índice de desemprego máis elevado desde 2018 (16,4%).
A EPA conclúe que a cidade do Lérez terminou o ano pasado cun 1% máis de desocupados que 2020, o primeiro ano de pandemia. E de forma paralela indica que a taxa de ocupación descendeu ao 45,3%, a porcentaxe máis baixa desde o segundo trimestre de 2015.
Por sectores. Diferenzas aparte, a EPA contabiliza na cidade 33.800 persoas con traballo, das que 27.000 (máis do 80%) están ocupadas no sector servizos, 4.100 na industria, 2.100 na construción e preto de 600 nas áreas de agricultura e pesca.
En canto ao perfil do emprego, a Enquisa de Poboación Activa calcula que uns 20.200 traballadores (o 60%) son asalariados do sector privado, 8.700 empregados públicos e 4.900 empresarios ou autónomos. E a nivel de contratacións, a pesar de que case o 80% dos contratos iniciais que se asinan ao ano son de carácter temporal, a EPA indica que o 63% dos pontevedreses contratados teñen un traballo fixo e que outro 24% encadean empregos temporais.
A nivel provincia, a lectura dos datos do desemprego son radicalmente contrarios aos do municipio, xa que a taxa do paro rexistrada no catro trimestre de 2021, do 12,7%, é a máis baixa da serie histórica actual (que empeza a mediados de 2009). E ademais, a taxa de ocupación xa iguala os números prepandemia, cun 46,1% da poboación empregada.
Os datos chocan diso co que sucede a nivel municipio, aínda que cabe recordar que, tal e como ocorreu en ocasións previas, as avaliacións mensuais que tamén publica o INE (en base ás cifras dos servizos públicos de emprego) arroxan outra perspectiva. De feito, segundo estas, o municipio pontevedrés pechou decembro de 2021 con 4.992 parados, o mellor fin de ano desde 2007.
Paro xuvenil. A nivel provincia a EPA ofrece datos máis detallados e deixa ver que dos 122.000 mozos de entre 16 e 29 anos que residen en Pontevedra só o 37% está empregado. Pola contra, o 8% está desocupado, o 2% busca o seu primeiro emprego, o 6,2% chegou a traballar nalgún momento pero despediu o ano sen contrato e o 54% está inactivo (sen traballar nin buscar emprego).
Ademais, a estatística tamén indica que o 63% dos mozos pontevedreses cursan estudos, pero non así o 35%, que acabaron a súa etapa formativa.
