As rúas de Pontevedra asistiron este mércores a unha singular versión de Thelma e Louise, pero no canto de Susan Sarandon e Geena Davis, os protagonistas nesta ocasión foron un veterano can mastín e unha inqueda ovella galega.
Todo comezou de madrugada, cando o lanudo animal decidiu que quería vivir unha aventura nocturna. Como puido, fuxiu do curro de Salcedo no que se atopaba e, do mesmo xeito que fixo Carol Ann en Poltergeist en 1982, "correu cara á luz" da gran cidade.
O vello mastín da vivenda decatouse da travesura e decidiu acompañala para brindarlle protección. Xuntos chegaron a Campolongo e ás 6.29 horas comezou o goteo de chamadas á central da Policía Local alertando de tan insólito dúo: primeiro pola avenida María Vitoria Moreno, logo polas inmediacións de Supermercados Froiz e despois na avenida de Vigo.
A fugitiva e o seu gardián chegaron ata Vialia e acabaron na Estación de Autobuses, en cuxa dársena decidiron agardar a chegada da Policía Local e os técnicos de Medio Ambiente.
A súa presenza non pasou desapercibida para as decenas de usuarios que a esa hora (7.30 da mañá) dispúñanse a subir ao autocar. "Eran moi mansos e moi sociables", afirma unha testemuña.
Grazas ao microchip do can localizouse ao seu propietario, que acudiu ao lugar aos poucos minutos para facerse cargo da parella e pór fin á súa ousada escapada nocturna.
