A nova estación intermodal estará lista para empezar o ano Xacobeo 2021. Así o confirmaron as autoridades este martes, durante unha visita ás obras que empezaron recentemente. O prazo para a realización dos traballos fixouse nos 12 meses e, de non haber atrasos, Pontevedra terá unha nova estación intermodal no próximo xaneiro. "Hoxe é un bo día para as comunicacións en Pontevedra, despois de tempo intentando darlle un tratamento cos tempos a esta estación, conseguímolo. Á fin e ao cabo, esta é porta de entrada da cidade", explicou na cita do martes César Mosquera, edil de Infraestruturas.
O orzamento reservado para a realización das obras é
A conselleira de Infraestruturas, Ethel Vázquez, comentou que o proxecto ten dúas actuacións, unha de mellora do propio edificio e outra que ten que ver coa contorna. A primeira delas contempla a mellora da fachada e a cuberta, o patio de dársenas e todo o interior da estación de autobuses. Ademais, a Xunta estudará a proposta dun grupo de condutores para crear unha sala de descanso na que poidan pasar as horas mortas. Foron os propios choferes os que se achegaron este martes ás autoridades para solicitar un espazo para eles.
Un dos obxectivos da nova estación, ademais de mellorar o aspecto da mesma para quen chegan, é "facilitar a mobilidade e intercambio de diferentes medios de transporte como forma de acadar esa Galicia verde que buscamos evitando ou uso do vehículo propio", en palabras de Ethel Vázquez. Deste xeito, unha pérgola identificará un itinerario peonil seguro que unirá a estación de bus e a de ferrocarrís.
O vicepresidente da Xunta, Alfonso Rueda, agradeceu o entendemento entre administracións que propicia "cambios espectaculares para ben" tanto neste caso, "que permitirá ter unha nova estación a pleno rendemento non ano Xacobeo", como con outras iniciativas nas que se produce colaboración entre a Xunta e o Concello, como o edificio de Benito Corbal, o edificio xudicial da Parda ou o Gran Montecelo, "que neste ano comezará as súas obras".
