Esther Padín Vidal (Cambados, 1968), profesora no IES A Xunqueira II de Pontevedra, é unha dos seis docentes galegos galardoados cun premio educativo Innovagal, que na categoría de centros educativos tamén recoñeceu o labor do CEIP Torre de Cela (Bueu), merecedor do primeiro premio, dotado con 10.000 euros.
Padín logrou un primeiro posto na modalidade docente, concretamente no apartado de ámbito científico tecnolóxico e matemático, cuxas liñas temáticas son a educación dixital (integración didáctica do TIC e traballo colaborativo en rede a través de espazos virtuais) e as iniciativas no ámbito STEM (ciencia, tecnoloxía, enxeñería e matemáticas polas súas siglas en inglés). Está dotado con 3.000 euros e supón "un recoñecemento a todo o traballo destes proxectos fose do horario lectivo".
"As prácticas innovadoras supoñen unha oportunidade para aplicar metodoloxías activas que sitúen ao alumnado como protagonista da súa propia aprendizaxe e que fomenten o traballo en equipo", indica a resolución da Secretaría Xeral de Educación e Formación Profesional. Ademais, "involucran varias disciplinas e promoven unha serie de melloras sostibles no tempo e aplicables noutros contextos educativos similares. A innovación educativa non se limita a unha acción puntual, senón que implica a planificación dun proceso de cambio que busca un impacto positivo na aprendizaxe do alumnado".
Tras nove anos no IES Pedro Floriani de Redondela, fai seis recalou no instituto pontevedrés, onde apostou pola innovación educativa e actualmente é a coordinadora do programa Espazos Maker e do bacharelato StemBach.
